Karrajua - Paisaia eta paradigma - Comments

Euskarazoak

Benito — Wed, 07 May 2008 16:46:50 +0200

Euskarazoak-eko Flapek ere eman du iritzia artikulu honi buruz. Interesgarria sarean daukagun ikasle saiatuenak Euskara inposatua mezuan dioena:

Bakoitzak bere iritzia edukiko du honi buruz, niretzat artikulu hauek euskara ikasteko gogo handiagoa ematen didate.

Adibide hobea

Benito — Tue, 29 Apr 2008 12:46:08 +0200

Ikaskuntza informala bideratzeko aurrekoan eman ditudanak baino adibide hobea gaur erabili.com-en: Gehi: Getxo euskalduntzeko hitzarmena.

Ez naiz konturatu den bakarra gainera: Merkataritza euskalduntzen (404 gela)

Bi lagungarri hauek zehatzago:

Ospakizunetarako liburuxka (pdf).
Etxeen alogeran eta salmentan laguntzeko hiztegia (pdf).

RTFM

Benito — Mon, 28 Apr 2008 17:05:36 +0200

Espero dezagun inork "kanpora eskuliburua" interpretazio hipirik ez egitea, RTFM zakar batekin erraz egin dezake topo bestela .

"Galtzak bete lan" diozu bestalde, baliteke. Kontua da lan hori norantz bideratu. Ez dakit berez paradigma-aldaketa dagoen: ikaskuntza nola gertatzen den, zer ikasi behar den, baliteke, hor dabiltza konektibismoa, konstruktibismoa eta enparauak. Baina nire ustez kontua paradigma baino areago ingurunea da, egiturak eta baliabideak.

Gure kasuan, uste dut, "euskara ikastea" kontzeptuari aukera guztiak topatzean datza, ikaskuntza arautu-formala ez ezik, bide eta era gehiago daudela konturatzea eta haiek sustatzea. Ez dakit zehazki zer izan daitekeen. Zantzu batzuk daude: mintzalagunak, egunkariarekin oparitzen diren euskara-metodoak, euskara errazeko produkzio literario-mediatikoa, sarean ditugun baliabide-bankuak, umeekin jardutea...

Beharbada, erronka handiena hizkuntzaren erabilera soziala sustatzearekin batera, ia euskaldunen multzo hori trebatzen eta ohitzen laguntzeko bideak bilatzea izan daiteke.

Ez dakit. Beharbada ia-euskaldun edo euskara ikasle baten tokian jarri, eta inguruneak zertan laguntzen dion eta zer laguntza gehiago eman diezaiokeen da galdera. Ikasteko eta erabiltzeko.

Gogoeta oso irekia da dena dela.

Mikel, Marta eta Ane: norantz goaz?

plisti-plasta — Mon, 28 Apr 2008 12:35:16 +0200

Nondik gatoz?: ezagutzaren transmisiotik (Mikel)

Non gaude?: transmisioa erabilerarekin uztartu nahian (Marta)

Nora goaz?: erabilera oinarri duen ikaskuntzara, bat-bateko erantzunera, itxurazko kaos batera, ikaskuntza ez-linealera, komunitatearen laguntzara, norberak gidatutako ikaskuntzara... (Ane)

Eta bitartean, zer? Bada bitartean, ikas-irakas paradigma aldatu, ikaskuntza formala eta informala uztartu, ikaskuntza-paisaiak sustatu, ikaskuntza pertsonalizatu... Galtzak bete lan!

Asmakizuna: Mikel, Marta eta Ane

plisti-plasta — Mon, 28 Apr 2008 12:33:03 +0200

Bideo-kamera berria oparitu diote Mikeli. Esku-liburua hartu (106 orr.), goitik behera irakurri eta irakurri ostean, bideo-kamera probatzeari ekin dio.

Bideo-kamera berria oparitu diote Martari. Esku-liburua eta bideo-kamera hartu ditu eta 106 orrialdeak irakurri ahala, bideo-kamera erabili du; irakurritakoa praktikan ipintzeko.

Bide-kamera berria oparitu diote Aneri. Kamera hartu eta intuizioa erabiliz, aprobatxoak egiteari ekin dio; zalantzaren bat duenean, esku-liburua edo interneteko foroa erabili du (edizio arazo bat konpontzeko, hain zuzen).

Nor ote da gazteena?

OHARRA: Zalantzarik izan ez baduzu, ikasteko moduak aldatzen ari diren seinale.

Paisaia eta paradigma

Benito — Thu, 24 Apr 2008 01:18:36 +0200

Blogosferan eta sarean oro har, irakaskuntza, hezkuntza eta teknologiaz idatzi denari apur bat adi ibili zaretenok segurunik hainbat berba eta kontzeptu entzun dituzue sarri: elearning2.0, konektibismoa, PLE edo Ikasteko Ingurune Birtuala, ikaskuntza informala, eportfolioa, sare sozialak, komunitateak...

Saltsatxua dabil, interneten eta blogosferan gehien bat. Paradigma aldaketaz ere ari dira batzuk. Eta, egia esanda, zirriborratzen diren gauza batzuek aldaketa nabarmena irudikatu dezakete. Besteak beste: ikaskuntzaren informalizazioa, deszentralizazioa, erakundeekin gero eta menpekotasun gutxiago, unean-uneko egin beharrekin lotura eta ez hainbeste programa eta tituluekin, irakaslearen papera eta figura bera ere une batzuetan lausotu egiten dira, sarearen kontzeptua agertzen da, deshierarkizazioa, kolaborazioaren papera azpimarratu....

Teknologiaren aurrerakuntza dago honen erroan neurri handi-handi batean. Hortik etorri dira gogoeta gehienak, eta, aldi berean, horretan geratzen dela iruditu zaie askori. Hala ere, ikaskuntza sistemen ikuspegia zabaldu egin nahi dela ere pentsa daiteke. Alemaniako esperientzia hau lekuko adibidez.

Ez daukat asmorik honetaz guztiaz laburpena egiteko, azkenotan belarrietan dantzan dabilzkidan doinuak dira hauek gehienak, besterik ez. Ez dakit era berean zer bide egingo duten, hala ere, durunda dabil belarrietan eta burua ere hasten da martxan, kontuari bueltak ematen.

Lehengo astean adibidez, Atoanen apuntatu nituen bi erreferentzia: Jasone Cenoz eta Durk Gorterek aurkeztu zuten Hizkuntzaren paisaiaren ikerketa lanaz egin zuten aipu hau, eta Emilio Quintanak Nodos_Elen idatzi zuen ¿Qué voy a hacer? ¿ordenar los paisajes? mezua. Paisaia hitza aipatzen dute biek, Emiliok Learnscape kontzeptua aurkeztu zigun, "ikas-paisaia" edo. Eta egosten eta gurera ekartzen hasita:

Ikas-paisaia, ikastearen ekologia, ikasteko ingurunea, naturala eta informala, norberak gidatuta. Euskara ikasteko badaukagu halako ingurunerik? Gure "paisaiak" noraino laguntzen du Jay Cross-ek aipatzen duen (ikas)prozesua gauzatzen?
Euskal Herriko hainbat lekutan une honetan ia-euskaldunak deitzen direnak euskaldunak baino gehiago dira. Paisaiaz dihardugula, "ikasle-paisaia" daukagula esan liteke. Irakaskuntza arautu, estandarizatu eta lokalizatutik aparte, ez genituzke behar hizkuntzaren ikaskuntza informala, ikastea, errazten eta ahalbidetzen duten "paisaiak"?
Zer-nolakoa izan behar luke euskararen ikas-paisaia? Zertaz ari gara zehazki? Zer elementu txertatu edo egokitu beharko genituzke ingurunean? Zertzuk jarduera sozial bideratu? Zerk laguntzen digu ikasten? Zelan sustatu elementu horiek eta ikasteko mekanismoak?
Paisaia elementu estatikoak baino gehiago direla esango nuke, azken batean, euskara hizkuntza eta komunikazio tresna bada, inguruan suertatzen zaizkigun komunikazio-ekintzak eta beraien partaideak eta elementuak ere dira paisaia horren parte. Alegia, entzun-irakurtzen dugun guztia eta beraien euskarriak, ikusizkoak edo entzunezkoak. Zerbait komunikatu edo komunikarazi nahi digun guztia.
Paisaia/ingurunea euskaltegia eta irakaslea ordeztera irits daiteke? Serendipiak kenduko digu lana? Ikuspegi ekologiko total horretan, "ingurunearekin berdinduko" ote gara inoiz?

Tira ba, ideien kaosetik gogoeta kaotikoa.

Irudia: Informal Learning, misterbisson Flickr-en

Pd: Loturengatik igarri duzue honez gero, ideien zurrunbilo honen errudun bi:

Gabinete de informatica ()
Nodos_ele ()