euskaltegiak

Hauxe da despedidea

Despedidako sasoian gaude, eskolak amaitzeko astebete inguru, eta ohiko erritua egin diren euskaltegi eta ikasleen jaiak loratuko dira han eta hemen, askori HABEren azterketek umorea hainbestearino garraztu ez badiete behintzat.

Lagin modura Bilboko Elkarlan euskaltegiek (Bilbo Zaharra, Gabriel Aresti, J.M. Zabala) datorren ostegunean, ekainak 21, Bilbon antolatu dutena, eta, bide batez, Elkarlan euskaltegiok atondu duten blogaren berri. Hemen daukazue gonbidapena.

Jai interesgarria dirudi, bertaratzen diren ikasleei gaitasun-agiria emango ei zaie. Doan gainera..

Igual han eta beste jai guztietan askok seguruenik estimatuko lukete azterketa ez gainditzeagatik, galduko duten diru-laguntza konpentsatzearren-edo, trago edo pintxo pare bat ere doan ematea.

Bi mezu

Erabili.com-en:

EAEko 6. mailako ikasleen % 51,3ak ez du gainditu B1 euskara proba

Lehen Hezkuntzako azken mailan (seigarrena) dabiltzan ikasleen erdiek baino gutxiagok menperatzen du maila egokian euskara EAEn. % 51,3ak ez du gainditu joan den azaroan ISEIk (Irakas-Sistema Ebaluatu eta Ikertzeko erakundea) 1.599 ikasleri eginiko B1 proba.

En mi palacio de cristal, gazte baten blogean:

Primer dia de cursillo

Hoy ha sido el primer dia de cursillo de EGA. Es un cursillo intensivo que se da en un euskaltegi cerca de mi casa. Para ser el primer dia nos han hecho trabajar y no me importa. Sacarse el EGA, es importante, de hecho es esencial si me quiero sacar las oposiciones de profesor, por que son diez puntos.

Lana daukagu apur baterako, ezta? Eskerrak hau ez dela Finlandia.

Irrintzi400 karpa

Iruñeko Donibane auzoko Irrintzi euskaltegiak urtero antolatzen duen karpa-jaia iragarri du bere blogean.

Hemen daukazue albistea eta egitaraua:

irrintzi400 karpa, larunbatean denok Donibanera!!!
Urtero bezala Iruñeko Donibane auzoko Irrintzi-AEK euskaltegiak antolatu du besta handi bat. Maiatzaren 26an, larunbatarekin, aurten 7. aek karpa izanen da. Egun osoko egitaraua prest dugu:
Goizeko 10etatik hasita, futbito txapelketak, dantzari txikien topaketa (100tik gora dantzari), 12etan fanfarrea,txalapartariak ...eta aurten, lehenengoz, Nafarroako bodega askoren partehartzearekin "ardo feria erraldoi eta herrikoia" eginen dugu. 14:30ean Herri Bazkaria (txartelak salgai aek-ko euskaltegietan) eta arratsaldean, karaokea, TRIKIZIO, talde sorpresa eta beste hamaika ikuskizun.

Paparrekoak II

Aurreko astean pasatu didaten pegatina bilduma non erakutsi topatzen banuen han ipiniko nuela esan nuen. Hemen daude.

Google-en Picasa Web Albums probatzen ibili naizela pegatina horientzako erakustoki ona izan litekeela eta 300 bat sartu ditut. Gehienak AEKrenak dira, baina besteen alerik ere badago.

Klikatu beheko irudian eta album osoa ikusiko duzue.

Euskaltegiak: pegatinak

Paparrekoak

Gaur arratsaldean lagun batek pegatina bildumak erakutsi dizkit. Pegatina bildumazale koadrilatxoa dabil gure herrian, bildumazale porrokatuak eta zehatzak, 30.000 aletik gorako bildumak ei daude hortik, batzuk duela 30 urtetik gora hasita.

Pegatinak, kartelak, txapak eta halakoak batuta gure herriaren azken urteotako historiaren erakusleihoa egin ahal duda barik, eta egin ere, pegatinazale hauek egiten ari dira. Lantzean behin batu, bildumak erakutsi, trukatu, komentatu,... eta artxibategia eraiki apurka-apurka. Sarera ez dute salto egin oraindino, baina egun batean ausartzen badira, ikusteko modukoa izango da duda barik.

Gure munduak ere pegatinak sortu ditu urteotan, hemen dauzkazue ale batzuk:

Hau zaharrenetako bat izango da seguruenik-

Hau deigarrienetako bat, ezta?

Hau ere ez da atzo goizekoa:

Honek ilusio berezia egin dit, berton egin nintzen, Biasterin, ez dut urtea zehazki gogoratzen, baina 1985 inguruan izan zela uste dut:

Eta hau izan zen bigarren Korrikako "petoa". Bilbo erdia egin nuen honelako batekin.

Askoz gehiago daude jakina, nostalgia ariketa ederra, eta historia ere bai. Astia badaukat saiatuko naiz nonbait gehiago ipintzen. Bestela, pegatineroek, esan dudan bezala, lantzean behin bilerak eta erakusketak egiten dituzte. Hurrengoa Bilboko Kukutza gaztetxean ekainaren 11tik 17ra, 16an truke eguna daukate bertan. Bestela, euskalduntze-alfabetatzearen ingurukoa egitea eskatzen badiezue, seguru ez dutela batere arazorik edukiko.

HABE: prestakuntza 2007

HABEk uda honetarako antolatu dituen prestakuntzarako ekitaldien eta saioen zerrenda heldu zait. Ez dut uste dokumentu pribatua edo babes legalekoa denik, beraz, hemen daukazue zerrenda:

A. Norberaren neurriko ikastaroak

Prestakuntza-ekitaldi hauek euskaltegi jakin batek edo sare batek beren irakasleentzat eratzen ditu, HABErekin lankidetzan. Baina gainontzeko euskaltegietako irakasleek ere eman dezakete izena; lekurik geratuz gero, ikastaro horiek egiteko aukera izango baitute.

• 159 – Proceso de aprendizaje de las lenguas y superación de errores (Sonsoles Fernández – Dirección General de Ordenación Educativa. Consejería de Educación. Madrid / Iñaki Pikabea eta Montse Maritxalar – Euskal Herriko Unibertsitatea. Donostia) Donostiako HABEren egoitza (2007/06/25-28)
• 144 – Integración del aula virtual en cursos presenciales de L2 (Bibiana M. Tonnelier – Aprender. Atenas) Leioako KZgunea (2007/06/27-29)
• 160 - Ikasbilen erabilera didaktikoa (Mikel Dorronsoro – HABE. Donostia) Juan Mateo Zabala euskaltegia – Bilbo (2007.06.26-27 edo 27-28)
• 142 – Ikasunitateen edukien arteko koherentzia eta ibilbidea eraikitzeko irizpideak (“Begoñako Andra Mari” Irakasle Eskola) Galdakaoko Udal Euskaltegia (2007/06/28-29)
• 161 – La tutoría presencial y la orientación del alumno (Adolfo Sánchez & Aurelio Ríos – Centro de Lenguas Modernas. Universidad de Granada) Donostiako HABEren egoitza (2007.07.3-5)
• 162 – Ahozko genero interaktiboen azterketa, irakaskuntza eta ebaluazioa (“Begoñako Andra Mari” Irakasle Eskola) Getxoko Kultur Etxea (2007/09/20-21)

B. Euskaltegietako irakasleentzako ikastaro irekiak

• 163 – El pensamiento de los alumnos en torno a cómo se aprende una lengua (Carmen Ramos. Universität Wuerzburg) Donostiako HABEren egoitza (2007.06.27-29)
• 164 – Uso de podcasting para la enseñanza de idiomas (Gorka Julio – Elurnet / Fernando Rosell – The Open University. Milton Keynes) Donostiako HABEren egoitza (2007.07.3-4 eta 9-10)
• 166 – El aprendizaje de la escritura en un mundo global y plurilingüe (Zuz.: Joanba Bergara – HABE. Donostia / Daniel Cassany – Universitat Pompeu Fabra. Barcelona) Donostiako Miramar Jauregia (2007/07/11-13). Matrikula: www.sc.ehu.es/cursosverano
• 167 – Planificación de una lección de euskera como segunda lengua (José Luis Vera Batista - Universidad de La Laguna) Euskararen Etxea – Bilboko San Ignazio auzoa (2007/09/12-14)
• 141 – Inteligencias múltiples y sus implicaciones didácticas (José Luis Vera Batista – Universidad de La Laguna) Donostiako HABEren egoitza (2007/09/17-19)

C. Hitzaldiak

Prestakuntza-ekitaldi hauek ikastaroen osagai direnez, ikastaroetarako matrikula egiten dutenei daude zuzenduta. Hitzaldietarako ez da, beraz, izena eman behar.

• H193 – Dime cómo planificas y te diré cómo evalúas; dime cómo evalúas y te diré cómo planificas (José Luis Vera Batista - Universidad de La Laguna) Euskararen Etxea – Bilboko San Ignazio auzoa (2007/09/14) Norentzat: 167 kodedun ikastaroa egingo dutenentzat.
  H198- Aprendizaje de lenguas: ¿por qué algunos errores son más resistentes? (Sonsoles Fernández – Dirección General de Ordenación Educativa. Consejería de Educación. Madrid) Donostiako HABEren egoitza (2007/06/25) Norentzat: 159 kodedun ikastaroa egingo dutenentzat.
• H199 – Podcasting para el aprendizaje de idiomas (Fernando Rosell – The Open University. Milton Keynes) Donostiako HABEren egoitza (2007.07.9) Norentzat: 164 kodedun ikastaroa egingo dutenentzat.
• H200 – Planificación, desarrollo y evaluación de actividades, lecciones, unidades didácticas y programas teniendo en cuenta las inteligencias múltiples (José Luis Vera Batista – Universidad de La Laguna) Donostiako HABEren egoitza (2007/09/19) Norentzat: 141 kodedun ikastaroa egingo dutenentzat.
• H201 – El tutor tutorizado: la tutoría presencial y la orientación del alumno de idiomas (Adolfo Sánchez & Aurelio Ríos – Centro de Lenguas Modernas. Universidad de Granada) Donostiako HABEren egoitza (2007.07.4) Norentzat: 161 kodedun ikastaroa egingo dutenentzat.
• H202 - El trabajo en Moodle: complemento a los cursos presenciales (Bibiana M. Tonnelier – Aprender. Atenas) Leioako KZgunea (2007/06/…) Norentzat: 144 kodedun ikastaroa egingo dutenentzat.
• H203 - Ahozko genero interaktiboen azterketa, irakaskuntza eta ebaluazioa (“Begoñako Andra Mari” Irakasle Eskola) Getxoko Kultur Etxea (2007/09/…) Norentzat: 162 kodedun ikastaroa egingo dutenentzat.
• H204 – El pensamiento de los alumnos en torno a cómo se aprende una lengua (Carmen Ramos - Wuerzburg Universität) Donostiako HABEren egoitza (2007.06…) Norentzat: 163 kodedun ikastaroa egingo dutenentzat.

D. Talde berezientzako ikastaroak

Ikastaro hauek proiektu jakin zenbaitetan ari diren euskaltegietako irakasleei daude zuzenduta.

• 165 – Moodle plataforma: oinarrizko funtzionalitateak eta erabilera didaktikoak (Ainhoa Ezeiza – Euskal Herriko Unibertsitatea. Donostia) Deustuko KZgunea (2007.07.2,3, 9 eta 10) Norentzat: “Moodle euskaltegietan” proiektuan ari diren euskaltegietako irakasleentzat.
• 165 – Moodle plataforma: oinarrizko funtzionalitateak eta erabilera didaktikoak (Ainhoa Ezeiza – Euskal Herriko Unibertsitatea. Donostia) Donostiako HABEren egoitza (2007.07.5, 6, 12 eta 13) Norentzat: “Moodle euskaltegietan” proiektuan ari diren euskaltegietako irakasleentzat.

Kantitatea behintzat badago. Izen ezagunak aurrekoetatik eta famagatik (Cassany), eta emaleen artean bertokoak hasi dira agertzen.

Eguneraketa 

Bide batez, ez dut uste konparagarria denik, baina elenred-en Cervantes Institutuaren programari egin ahal diozue kukutxua (jaitsi, pdf, 1.6 mb). Orri berean ICeko Isabel Bermejok elkarrizketa batean formazio planaren berri ematen du bideoan. Beste orri honetan ICen formazio ikastaroen programa aurkezten du beste bideo batek.

Balantzei tiraka

Aizu!ko elkarrizketa dela eta blogorreari eman nion kantxa eta Karrajuaren sasi-balantzea egin nuen lehengoan. Handik gutxira, berriz, sarean hausnarketa horretan jarraitzeko motiboa eman didaten hiru mezu irakurri ditut. Hona hemen mezuon aipua norberarenak gehituta:

Komunitate izpiritua

IKTeroen blogean bigarren urteurrena ospatzearekin batera balantze gazi-geza egin zuten Bi urte betetzen ditugu gaur mezuan. Kezkatuta egoteko motibo pare bat aipatu dituzte, eta gurera ekarri nahi nuke gogoeta, pasarte honetan esandakoak gehien bat:

Halere, eta Sareko Argia saria jaso genuen egunean esan nuen bezala, faltan botatzen dut komunitate ispiritua. Faltan botatzen ditut hausnarketa sakonak (aurrean ditugun erronkei aurre egiteko ideiak, proposamenak…), faltan botatzen ditut eztabaidak (nork ezagutzen ditu hiruzpalau iruzkin baino gehiago dituen irakaskuntzari buruzko artikulurik?), faltan botatzen ditut komunitatearen mesedean sorturiko proiektuak (HeziTop bezalakoak, adibidez), faltan botatzen dut… Euskal Herriko hezkuntza sistemarekiko identifikazioa eta atxikimendua. Zoritxarrez, interneten ere, oraindik hezkuntza sistema zatikatua bizi dugula iruditzen zait. Sare publikoak alde batetik, ikastolok bestetik, kristau eskolak euren aldetik, Lanbide Heziketakoek ere berdin… Nork ezagutzen ditu irakaskuntza mundutik bertatik, komunitatearen mesedean (komunitatea esaten dudanean, komunitate osoaz ari naiz, berezitasunik gabe) aurrera eramandako proiektuak? HeziTop-en atzean dagoen filosofia bultzatzen duen besterik ba ote dago? Mila aldiz esandako gauzak direla badakit eta, agian, norbaitek inozokeriak direla pentsa dezake, ez dakit. Internet, gaur egun bizi dugun fragmentazio hau gainditzeko tresna paregabea dela sinesten dut; gurea baino handiagoak diren beste komunitateetan aspaldi jabetu ziren honetaz, euren mesederako, noski.

Euskal Herrian hezkuntzaren mundua eta euskaltegien mundua bat ez diren arren, eta haien artean harreman handirik ez dagoen arren, IKTeroen sensatzio hori berori daukat neuk ere, hausnarketa, kohesioa eta komunikazioa ez dira asko ikusten gurean, publikoan behintzat. Atomizazioa eta zatiketa guk ere ohikoak ditugula uste dut. Han eskola sareak, hemen euskaltegien sareak, euskaltegiak eurak, administrazioa,... Horri gehituko nioke konpententzia eta mesfidantza ikutua.

Hezkuntza sistemarekiko atxikimendua eta identifikazioa dioten lekuan berriz, berdin esango nuke helduen euskalduntze-alfabetatzeari dagokionez, entusiasmo falta, helduen hizkuntza-irakasleen status laboral-sozialak areagotuta.

Ondorioak, komunikazio gutxi, ideia berriak ez dira martxan jartzen edo ez dira garatzen, "elite" bati egiten zaio kasu maila teorikoan, baina komunikazio eta hartu-eman gutxi egonda, sektorearen garapena geldoa eta astuna da, honek ere, jakina, ez du irakaslea asko motibatzen.

Patenteak eta eliteak

Bigarren gogoeta-iturria Julen Iturbe-Ormaetxeren Consultoria artesana en red blogeko mezu honetatik hartu dut: ¿Es posible una wikipedia de empresa?. Julen enpresa munduan dabilen kontsultorea da, blogari ekina, eta mezu honetan bezala beste edozeinetatik hartu daitezke ideiak eta hausnarketarako abiapuntuak. Gurean azkenengo urteotan enpresa munduari begira jarri gara kudeaketa kontuetan: kalitatea, prozesuak,... Ez zaigu gustatzen enpresak garela aitortzea, seguruenik enpresaren ideia klasikoak uxatuta, baina onartu egin beharko da profesional batzuek zerbitzua eskaintzen duten erakundeak enpresatik uste baino gehiago daukala. Julenen baieztapen (ironiko) pare bati buelta:

La empresa sufre de patentitis, quiere hacer negocio con lo que considera su conocimiento explícito.

Gure euskaltegietan ezagutza handia dago, pertsonengan gehien bat, baina ez dakit zergatik, uste izaten dugu erakundearen balioa saldu ahal dituen dokumentuetan dagoela: materialak, programak,... Patentepean eduki, edo bestela gordeta, inork ikusi ez dezan. Oraindik uste dugu geure balioa materialetan dagoela, eta digitalizazioaren era honetan dokumentatuta dagoenaren ibilia ia kontrolaezina da, "konpetentziaren" eskuetara erraz asko heldu daiteke alegia, baina ez dirudi horretan konturatu nahi dugunik. Software librearen mundutik etorri zen aspaldi edukien ikuspegi berria, zabalduz gero, egiten duguna ezagutarazi eta hobetzeko aukera ematen dugu, eta norberak daukan altxorrik handiena ez da eduki hori, eduki hori kudeatzen eta egokitzen duten pertsonak baino, eta pertsonak garatzeko tresnetariko bat komunikazioa da, ez giltzapeko karpetak.

La empresa ha endiosado el saber experto frente al saber profano. Su wikipedia carecería del 80% de lo que sus personas saben, simplemente porque cree que no es relevante.

Jolausek lehengo mezuari egin zion komentarioan agertzen zituen kezketako bati erantzuteko klabea dago hemen nire ustez. "Elitea" dago alde batetik (teknikariak-didaktikariak-adituak), "tropa" bestetik. Eta tropa hori ez da ziur sentitzen bere ekarpenak egiteko orduan, norbaiten bedeinkapena barik. Elite hori, bestalde, ez da erraz plazara agertzen, eta agertzen denean formalitate handiarekin (ahoz edo idatziz), kanal gutxi eta zailak. Norberaren ekarpenekin osatutako ezagutzak zaila dauka horrela aurrera egitea.

Auzoko lapikoa

Hirugarrena ELEren mundu paralelotik dator, gaztelania helduei irakasten dietenen mundutik. Mundu horretan blogosfera interesgarria dabilela aitortu dut behin baino gehiagotan, eta harritu egin naiz Makel.ele blogean irakurri dudan honekin: La botella medio vacía. Blogosfera horrek espero zena ez duela betetzen sentitzen hasi dira batzuk, guretik ikusita inbidia emateko motibo gehiago, baina tira. Balantze horretan arrazoi bat:

una cosa que me llama particularmente la atención es lo poco que los profesores y jefes de estudios que trabajan en el Instituto Cervantes hacen uso de las herramientas 2.0..

Eliteen asuntu horrekin berriro. Ez dut parekatze erraza egingo eta ez dut esango HABEko jendeak web2.0 zer gutxi erabiltzen duen (egia bada ere), oro har, gure sektoreko aditu-didaktikari-teknikariok zer gutxi erabiltzen dugun baino. Tropak erabiltzea nahi genuke, baina honetan lidergoa erakutsi beharko luketenak (aurrekoan aipatu duguna egia bada) ez dira komunikazioan aitzindariak izaten. Akademizismo gehiegi? Ez dakigu maila jaisten? Ala botatzen duguna ez zaio inori interesatzen? Edo ez dakigu interesgarri egiten?

Mezu horretako iruzkin bateko aipuarekin amaituko dut:

Quizá es que faltan herramientas comunes, plataformas que agrupen, “webrings” los llamaría Francisco Herrera (es una palabra que me encanta, tan retro…). Supongo que si la gente se mete como loca en cosas tan casposas1.0 como las listas de distribución es porque se siente en compañía…

Web2.0 honetan itxurarekin geratu gara sarri, ondo mamitu barik atzetik teknologia kontuak baino gehiago daudela. Denok blogari jartzeak ez digu ezer konponduko blog edo dena delako horien artean hartu-eman minimoa bermatzen ez bada, Jolausek aipatzen duen komunitate-izpiritu hori eraikitzen ez bada alegia. Sare sozial kontzeptua da nire ustez giltzarria, ez blog, wiki, tag, LMS eta enparauen parafernalia terminologikoa. Gune kolaboratiboak eta motibagarriak eraikitzeko ahalegina egin beharko genuke, zerbait aportatzen dutenak eta besteekiko harremana erraza egiten dutenak. Aukerak: blog kolektiboak, metablogak,..akaso. Edozelan ere, saltsa dabilen edozer.

Balio erantsiko zerbitzuak

HABE aldizkarian argitaratu dute Mondragon Linguaren zerbitzuei buruzko artikulua. Ikasbilen dokutekan daukazue irakurgai:

Balio erantsiko zerbitzuak euskara-ikaslearentzat: Mondragon Lingua euskaltegien apustua

Mondragon Linguaren webgunean azaldu dira zerbitzu hauek aspaldian, baina egia esanda, artikulua irakurri arte ez diot erreparatu zerbitzuen eskaintza horri. Hauek aurkitu ditut eskaintzan:

• Lingua bazkariak: irakaslearekin bazkaltzeko aukera ematen zaie bertako ikasleei, praktikatzeko, baita aurrez aurreko eskolaren bat ordezkatzeko. Gogora etorri zait duela aste batzuk aipatu genuen Galeseko lehiaketa. Ideia bitxia dirudi lehenengo batean, baina gogoratu zenbat bazkari-afari-txikiteo-parranda egin ohi ditugun ikasleekin bestela. Eskaintzan sartu dute hauek, besteoi lotsa emango liguke akaso horrelakoak saltzea?
• Txat-ak. Astero, irakasle baten gidaritzapean antolatzen ei dira.
• Mp3en deskarga. Idatzizko testuen grabazioak dira dirudienez. Ebakera praktikatzeko.
• Grabatutako eskolak. Ez dakit aurrez aurreko eskolen grabazioak ala berariaz atondutakoak diren. Hauek ere aukeran ematen zaizkie aurrez aurreko eskoletara joan ezin direnei.
• E-posta bidezko ikasgai laburrak, "hizkuntza-pilulak" deitzen diete eurek. Ikasgai osagarriak dira antza. Ikasleari astean behin e-postara bidaltzen zaizkionak.

Zerbitzu hauek guztiak ikaslearentzat hautazkoak dira eta matrikularen prezioarekin batera ordaintzen dira. Honekin batera deigarria da hartzen duten konpromisoa. Behin ikastaroaren epea igarota, eta ikasleak egin behareko ahalegina egin arren ez badu xede-mailara heldu, doan jarraitzeko aukera ematen zaio harik eta maila hori erdietsi arte.

Mondragon Lingua teknologia berrietan ardaztutako hizkuntz-ikaskuntza eskaintzen du, euskararen irakaskuntzan Bai&By izan zen aintzindaria honetan. Honakoak, ez dakit zehazki zergatik, ez dira euskaltegiaren kontzeptu klasikoan sartu ohi. Baina aitortu behar da berrikuntza ekarri dutela gure mundu honetara, eta gutxi-asko gauzak berplanteatzeko beharra gogorarazten digute guztioi.

Nire partez hausnarketatxo pare bat:

• Balio erantsiko zerbitzuak denok eskaintzen ditugula esango nuke. Baina, edo ez ditugu aintzat hartzen eskaintza zabaltzeko orduan, edo ez ditugu serioski garatzen, edo zerbitzutzat hartu beharrean aukera osagarritzat-festibotzat hartzen ditugu sarri. Serioa eta "saldu" litekeen bakarra "klasea" baino ez da?.
• Lerro estu batean mugitzen ohitu gara, talde bat-irakasle bat-maila bat-ordutegi bat-gela bat-programa bat korrelazio batean sartuta, gero eta zailagoa dena aurrera eramaten. Hortik irteten dena "autoikaskuntza" etiketaren barruan sartzeko joera daukagu, baina uste dut beste zerbait dela, eskaintzaren indibidualizatzea eta, aldi berean modularizatzea eskaintzen zaigu, hau da, zerbitzu monolitikoa barik, zerbitzuen aukera ugariagoa eta norberari egokituagoa. Ez dut uste honek eskola partikularrak eskaintzea esan nahi duenik, hizkuntza ikasteko ahalik eta aukera gehien ematea (edo nahastea) baino: taldeka edo-eta bakarka, instrukzioa edo-eta praktika, aurrez aurre edo-eta urrunekoan, papera edo-eta ordenagailua, ikasgelan edo-eta jantokian,...
• Iritzia eduki dut sarri teknologia berriek ez dutela ezer konpontzen aplikazio didaktiko egokirik gabe. Ikusi ditudan teknomaterial batzuek inpresio horixe eman didate: didaktikoki ez dutela ezer aportatzen. Baina argi dago ezin garela sartu tradizionalismo anti-teknologiko batean, teknologia aurrera doa, eta ikasleak ere konturatu dira. Sinestu nahi nuke teknologia gehien erabiltzen duenak barik, teknologiari erabilera egokiena ematen dionak edukiko duela arrakasta gehien.

Edozelan ere, honako albisteak ondo etortzen dira hamabost minutuko gloriako unea pasatu dela eta aurrera egin behar dela gogoratzeko.