euskaltegiak

0708 kanpaina eta doakoak

Aurrera doa matrikulazio kanpaina. Joan den larunbatean gehigarri hau banatu zen Vocento taldeko egunkariekin. Euskaltegi talde batek sustatu du gehigarria Ikusi, ikasi. Da el paso hacia el euskera leloarekin.

Barruan Mertxe Mugika (AEK) eta Gurutze Sarasolarekin (IKA) elkarrizketa, informazio-artikulua eta euskaltegien zerrenda.

Ikasbilen ere agertu da albistea.

Dena dela gaurko slogan indartsuena Santurtziko Udal Euskaltegiko webgunean ikusi dut: Euskara doan ikasi!! Argudio komertzial eztabaidaezina.

Santurtzin ez dituzte klaseak debalde emango hala ere. Albistea bestelakoa da, baina ez horregatik interes gutxikoa. Baliabide Zentro Birtuala antolatu dute santurtziarrek, han gunean erregistratu ostean, testuak, ikastaroak eta kontsultarako baliabideak eskainiko dituzte doan, norberak bere kontura erabiltzeko hala ere.

Era berean, gaur Maite Goñi ikteroak aspaldian zabaldu zuen EGA ikastaroa osatu eta berrantolatu duela kontatu digu. Lan polita egiten dabil Maite. Susmoa daukat hala ere euskaltegietako jendearen kolaborazio gehiago bereziki estimatuko lukeela.

Publizitateaz hasi gara, baina Santurtzikoak eta Maite ez dut uste publizitateagatik ari direnik. Baten batek pentsatuko du horrelakoekin jendea ez dela euskaltegietara etorriko akaso. Nik kontrakoa uste dut, baliabideen zabalkundeak euskara ikastera animatzeko eta euskaltegietara etortzeko gehiago egingo du animatu uxatu baino.

Hori bai irakasleari buruko min bat ekar diezaioke honek guztiak, ezin izango da materiala banatzera mugatu.

Tira ba, neuk ere egingo dut neure ekarpen txikitxoa.

Bide batez, zorionak Iruñeko Donibaneko Irrintzikoei.

Topikoak eta graziosoak

Lankide batek bidali eta iritzia eskatu dit bideo honen gainean:

"Umore bilbainitoa" dino berak. Niri Vaya Semanitaren umoreak gero eta grazia gutxiago egiten dit, topiko regatistez beteta eta txiste fazil-eskatologikora erraz ekarrita (honekin eta honekin konforme).

Hor botatzen diren batzuk gertatu, gertatzen dira, baina sketch-a prestatu duena euskaltegia barrutik ikusita baino, entzun dituen topikoetan inspiratu dela esango nuke.

Eta euskaltegia eta euskara ikastearen inguruan baditugu barre egiteko motiboak eta pasadizoak, hauek baino askoz hobeak. Ezta?

Euskaltegian apuntatuta, Vaya Semanitaren txisteak asko hobetuko lirateke seguruenik.

Curriculum ez kurrikularrak

Ikasturte berriaren atarian ez da publizitatea dantzan dabilen bakarra. Karrajura curriculumak ere heldu dira egunotan.

Detaile batekin akordatu naiz lehenengo, Arkaitz Karrajuko kolaboratzaileak zelan sinatu zuen lehengo egunean erabili.com-en argitaratu zuen artikulua.

Gero, lanean egunotan behin baino gehiagotan entzun dudan galdera: Zenbat jende daukagu glotodidaktikan?. Irakasleen egoeraren inguruan irakurri dudan zerbait ondoren.

Helduen euskara irakasleen egoera azken batean. Eta berriak ez diren gogoetak parrastaka:

• Irakasleen egoera (laborala, soziala, profesionala...) ez nuke esango ona izaten denik, baina ez dakit zergatik, gutxi egiten da berba honetaz. Tabua ote da?
• Irakasleak lortzeko arazoak daudela dirudi. Leku askotan behintzat. Joan-etorri handia-edo, egonkortasun gutxi... Prekarietateaz hitz egin ahal dugu? Plantilak egonkortzen dira?
• Argi dago, egoera desberdinak daude, funtzionarioetatik ordu gutxiko ordukakoetara. Makroeuskaltegi ondo hornituetatik euskaltegi txikietara. Orekatuta dago sektorea?
• Gure lanak prestigioa daukala pentsa daiteke. Euskararen zabaltzaileak, jende majoa, jatorra ei gara. Baina kostatzen da jende berria erakartzea. Oraindino zabiltza euskaltegian? galdera behin baino sarriago entzunda nago ni neu behintzat. Ez da lanbide serioa? Inor ez da ezetz esatera ausartuko. Baina pentsatu?
• Kohesiorik badago gure sektorean? Irakasle berria komunitate baten partaide sentitzen da? Sektore batekoa?
• Pozik gaude gure lanarekin? Zerk ekartzen digu damua edo frustrazioa? Bizi ahal da honetatik eta honela?
• Prestatuta sentitzen gara? Seguritatea, animoa, konfidantza... daukagu?

Haritik tiratzen jarraitu daiteke, ariketa osasuntsua izan daiteke nire ustez. Curriculuma idazten hastea baino nahiago nuke.

0708 kanpaina

0708ko matrikulazio kanpainako lehenengo perretxikoak hasi dira irteten.

HABEk aurten "Zatoz euskaltegira!" leloa hautatu du, bideoa, irratirako iragarkia eta afixa prestatu ditu. Hemen daukaue Ikasbileko albistea. Eta hemen behean bideoa.

Udal Euskaltegiek ere diseinatuta daukate kanpaina, "Nahi baduzu, egingo duzu" leloa, eta hau da kartela. Azpeitiko Udal Euskaltegikoek eman digute kanpainaren azalpena erabili.com-en.

AEKn webgunea berritzen ari direla dirudi, helbidea ere aldatu da: www.aek.org da oraingoa, www.aeknet.net zaharrera joanda helbide berrira bidaltzen da hala ere. Kanpainarako flash animazioa jarri dute bertan, leloa "Euskara, zure altxorra/ Euskara, tu secreto".

Elkarlanen blogean "Bilbon euskaraz" irakurtzen den kartela daukagu, eta Gabriel Aresti euskaltegiaren webgunean banner hau ikus daiteke, haren 25. urteurrenaren karira.

Besteen webguneetan ez dut kanpaina edo lelo berririk ikusi oraingoz. Datozen egunotan jarraituko dugu kukutxua egiten.

Bide batez, alboko barran aurkitu ditudan publizitate kartelak ipini ditut bistan. Zuena ez badago eta agertzea nahi baduzue, bidali eta ipiniko dut.

Aprender euskera - Search

Kanpotik euskara ikastera etorri nahi zuen baten berri izan nuen duela gutxi. Euskaltegien eta euskara ikasteko zentroen berri ez zuela edukiko pentsatu nuen, eta seguruenik ikasteko nora jo-eta informazio bila internetera joko zuen, hau da, ohiko bilatzaileetan "aprender euskera" edo halako zerbait ipini eta emaitzen ordenari jarraituko ziola, internauta gehienok egiten dugun bezala, nahikoa logikoa gaur egun, ezta?

Matrikulazio sasoi nagusian sartu gara, eta laster euskaltegiok geure kanpainak plazaratzen hasiko gara. Ia denok gaude amaraunean, batzuek berritu ere egin dute ataria. Beraz "aprender euskara" hori bilatuz gero, han agertu beharko dugu.

Proba egjn dut "aprender euskara" hori Google-en eta Yahoo-n sartu, eta Google-en euskaltegi bakarra agertzen da lehenengo orrian (Santurtziko Udal Euskaltegia, 7. lekuan) , Yahoo-n, berriz, lehenengoan bat ere ez.

Lehenengo postuetan euskara ikasteko webguneak, CDak, metodoak, edo albiste hutsak...

Gaztelaniaz bilatu dudalako izan ote da? "Euskara ikasi" sartu eta emaitza ez da hobea, ez horixe!

SEO tekniketan jantzi beharko dugu, edo, hobeto esanda, geure webguneak jantzi beharko ditugu. Osterantzean, amaraunean ez gara topatzen errazak.

Badaukagu janzten nondik hasi gainera (edo hemen entzun).

Santurtziko Udal Euskaltegia: webgunea berritzen

Santurtziko Udal Euskaltegikoak bereziki aktiboak ditugu gure sektore honetan, didaktika zein teknologia alorretan. Eta abuztuan geldirik ezin egon eta webgunea berdiseinatu egin dute.

Aurrekoan atari osoa antolatzeko Moodle erabili zuten. Orain Joomla CMSa erabilita berdiseinatu dute, atariaren sarrera gehien bat. Moodle Ikasgela birtualerako kontserbatu dute.

Oraindik berregokitzapena amaitu barik dagoela dirudi, haren albiste ematen dute, baina labur-labur. Hala ere nobedade batzuk ikusi ahal dira. Albistegi ezberdinak atondu dituzte: euskaltegia, ekitaldiak, ikastaroak eta azterketak eta deialdiak. Inkestak ere jarri dituzte. Interesgarriena proiektuak atalean dugu, didakteka atalean hain zuzen ere. Bertan sartu eta wikia dela konturatuko gara. Honela azaldu dute sarreran:

Didaktekaren helburu nagusia euskara-irakasleen esku era guztietako materialak uztea da, teoria eta hausnarketa uztartuz hezkuntza-praktika mesedetzeko asmoz. Horretarako, euskara irakatsi eta ikasteko tresnak, baliabideak eta dokumentazioa era sistematikoan eta kolaboratiboan bildu eta sailkatu nahi ditugu.

Euskara irakasleontzako baliabide bilduma egin nahi da dirudienez, era kolaboratiboan. Dagoeneko material batzuk jarri dituzte eskura. Erabili duten software-arengatik (Mediawiki), euskalduntze-alfabetatzearen wikipediaren traza hartu dakioke.

Gure sektorean kolaborazioa eta han-hemen dihardugunon parte-hartzearen beharra sarri azpimarratu dugu hemendik ere. Seguruenik horretara heltzea tresna eta teknologiatik haragoko arazoa ere bada. Kolaborazioa suspertzeko harremanak eta ohiturak zabaltzearena adibidez.

SUEkoen proiektu honi jarraitu egin beharko zaio beraz.

Magikoa?

Gaur8n Elizabeth Macklin New Yorkeko poetari buruzko artikulu polita idatzi du Ines Intxaustik aste honetan. Pasarte hau hona ekartzeko modukoa begitandu zait, Euskal Herrira etorri, euskara ikasten hasi eta lehenengo berbak esan behar zituenekoa:

...«Nor zara zu?», galdetu zion irakasleak. «Ni Elizabeth naiz». «Zer zara zu?» galdetu zion ostean. Galdera entzun bezain azkar, inoiz ahoskatu gabeko erantzuna ematera zihoala jabetu zen: «Ni idazlea naiz». Ordura arte ez omen zion inoiz buruari «I'm a writter» esan. 46 urte zituen dagoeneko. Ez al da magikoa?

Inguruan uste dugun baino magia gehiago dabil, guk ez dugu beti sentitzen baina. Lastima!

Elizabeth Macklinen webgunea bisitatzen baduzue, euskara ikasi eta praktikatu bitarteko esperientzia-testuetan "aurkitu" zuen poema esperimental hau duzue: Who Put the Code in the Dagoeneko?

Berton Macklin-ek

...euskara eta aurre-itzulpenaren mundua esploratzen du -non "ulertzen ez duzunean zaila da gaizki ulertzeak azaltzea, eta, bereziki ez dakizunean ez duzula ulertzen".

Irakasleak: ikerketa

Congreso Virtual ELEren markoan planteatu ziren ponentzia eta lanen berri eman genuen duela hilabete inguru. Haien artean gaztelania irakasleen egoera soziolaboralaren gaineko ikerketa bat.

Inkesta itxi egin da, eta lanaren ondorioak plazaratzeko eta lantzeko bloga zabaldu dute egileek: Situación ELE.

Emaitzei eta ondorioei egin diet kuku. Ez dira behin betikoak eta ez dakit ikerketak zer fidagarritasun daukan. Hala ere, helduen euskara irakasleen egoerarekin konparatzeko tentazioa etorri da segituan.

Antton Iñurritegik Bat aldizkarian eman zituen datu batzuk eduki ditut eskura, hemen ere kontsultatu daitezke batzuk. Ez dute kointziditzen, baina tira.

2005-06 ikasturterako datu hauek eman zituen adibidez:

Irakasleak: 1.523

Batez besteko adina: 38

Adin-taldeak

• <30: 25,48%
• 31-35: 17,27%
• 36-40: 25,48%
• 41-45: 19,04%
• 46-50: 8,67%
• >51: 4,86%

Ikasketak

• Litzentziadunak: 57.61 %
• Maisutzadunak: 18.19%
• beste diplomatuak: 13.62%
• gaituak: 10.58%
• Bestelakorik: 0%

Esperientzia:

• Aurrez emandako ikasturteak (batez beste): 10,27
• Aurrez emandako eskola-orduak (batez beste): 7.033

Gaztelania irakasleak baino zaharragoak garela dirudi, erdiak baino gehiago 35 urteko mugatik gora gabiltza. Inkestan berriz hortik behera dabiltza gehienak. Iñurrategik oraindik gazteak garela dio, piropotzat hartuko dugu.

Formazioa, edo hobeto esanda, ikasketak da konparatu daitekeen hurrengo eta azkenengo puntua. ELE irakasleak filologoak direla diote, gurean litzentziadunak erdia baino apur bat gehiago, filologo asko ibiliko dira gurean ere, ez dakit proportzioa baina.

Bestelakoetan ez daukagu konparatzeko daturik. Interesantea iruditu zait motibazioaren galdera, ELE irakasle horien erdiak bokazioz aukeratu dutela aitortu dute. Gurean helduen euskara irakaslea izateko bokazioa hainbesterainokoa izan daiteke? Zenbatek daukate bokazioa HEAn jarrita?

ELE irakasle horien artean %80k egoera laborala kezkagarria edo oso kezkagarria dela diote. Soldata baxuak dabiltza mundu horretan, 1.000 eurotik behera asko. Gurean alde nabarmenak egon daitezke administrazio langilearen estatusa daukatenen eta bestelakoen artean. Baina oro har ez dut uste hortik oso urrun gabiltzanik.

Inestabilitate handia aipatzen dute, gurean euskaltegi homologatuetan gerta daitekeen kasua izan daiteke, baina Udal Euskaltegietan ere zenbat jende dabil behin-behineko lanpostuetan?

Ondorioetan hiru arazo nagusi nabarmendu dituzte:

1. Soldata duinaren beharra.
2. Egonkortasun falta.
3. Sektorearen erregulazio falta.

Irakasleak gero eta prestatuago eta interesatuago dabiltzala diote, baina lan-baldintzak ez ei daude horren neurrian. Gaztetasuna gainera ezegonkortasunaren seinaletzat hartzen dute, adinarekin hartu behar diren erantzunkizun ekonomikoei eusteko oztopoen ondoriotzat hain zuzen ere.

Egitekoen artean elkargo profesionala eta konbenioa sortzea proposatu dute.

Antzekotasunak bai, baina aldeak ere badaudela begitandu zait. Horrek ez du esan nahi HEAko irakasleen egoera soziolaborala ideala denik inondik ere. Egonkortasuna gurean apur bat handiagoa izan daiteke, baina irakaslearen lanaren erregularizaziorako hemen ere zerbaiten faltan gaudela uste dut, alderdi sozial, laboral eta profesionaletik.

Zer diozue zuek?